पुणे : ‘महाराष्ट्र कॉस्मॉपॉलिटन एज्युकेशन सोसायटी’च्या ‘पी. ए. इनामदार कॉलेज ऑफ व्हिज्युअल इफेक्ट्स, डिझाइन अँड आर्टस’च्या वतीने ‘१७ व्या आंतरराष्ट्रीय अॅनिमेशन डे’ निमित्त ‘अखिल भारतीय कला शिक्षक गौरव पुरस्कार २०१८-१९’चे आयोजन करण्यात आले होते. या वेळी भारतीय रुपयाच्या नव्या डिझाईनचे डिझायनर डॉ. उदय कुमार धर्मालिंगम यांच्या हस्ते वैभव कुमरेश (टू डी अॅनिमेटर), सुधाकर चव्हाण (आर्टिस्ट), नितीन देसाई (चित्रपट निर्मिती), रावसाहेब गुरव (आर्टिस्ट) या कलागुरूंचा गौरव करण्यात आला.
एम. सी. ई. सोसायटीचे अध्यक्ष डॉ. पी. ए. इनामदार, सचिव लतिफ मगदूम, सहसचिव प्रा. इरफान शेख, प्राचार्य ऋषी आचार्य यांच्यासह प्राध्यापक आणि कर्मचारी या वेळी उपस्थित होते.
‘कलाकरांच्या कामासाठी उत्कटता असणे आवश्यक आहे. जगावर राज्य करण्यासाठी आपण स्वत:ला शोधण्याचा प्रयत्न करावा’, असे डॉ. उदय कुमार धर्मालिंगम यांनी सांगितले.
दर वर्षी कला क्षेत्र, ग्राफीक डिझाईन, अॅनिमेशन, व्हिजुअल इफेक्ट्स, स्पेशल ईफेक्ट्स, क्रिएटिव्ह फोटोग्राफी, पेंटींग क्राफ्ट, शिल्पकला, ललित कला, साहित्य, चित्रपट या क्षेत्रातील कलाकार आणि शिक्षकांना, कलागुरुंना हे पुरस्कार देण्यात येतात.
